मेलम्चीको पानीले बाग्मतीको बहाव बढ्याे, नदी सफा हुँदै

समाचार

काठमाडाैं । मेलम्ची खोलाबाट २६.५ किमी लामो सुरुङ हुँदै ल्याइएको पानी सुन्दरीजल प्रशोधन केन्द्रबाट बाग्मतीमा मिसाइएपछि पानी बढेको छ ।

मेलम्ची खोलाबाट २ सय ६० लिटर पानी प्रतिसेकेण्ड आएको मेलम्ची खानेपानी विकास समितिले जनाएको छ । यही फागुन २२ गते शनिबार बेलुकी प्रधानमन्त्री केपी शर्मा ओलीले मेलम्चीबाट ल्याइएकाे पानी बाग्मतीमा मिसाउनु भएपछि पशुपति क्षेत्रसम्मको नदी केही सफा देखिएको छ ।

नदीमा जमेको कालो लेदो बाग्मतीमा बहाव बढेपछि बगाएको देखिएको अधिकार सम्पन्न बाग्मती सभ्यता एकीकृत विकास समितिका सञ्चालक सदस्य डा माला खरेलले जानकारी दिनुभयो । बाग्मतीमा मेलम्चीको पानी मिसाइएपछि बहाव बढेको देखिए पनि नदीको चौडाइ फराकिलो भएको स्थानमा भने ढाकिएको छैन ।

यही फागुन २६ गतेदेखि मेलम्चीको पानी बहाव बढाएर पशुपतिसम्म स्वच्छ बनाउने योजना रहेको प्रधामन्त्री ओलीले कार्यक्रममा सुनाउनुभएको थियो । सुरुङ नभरिएसम्म पानी नबढाइने मेलम्ची खानेपानी आयोजनाका इञ्जिनीयर बर्मलाल राजभण्डारीले जानकारी दिनुभयो ।

वर्षामा आकाशको पानीले बाग्मती भरिने गरे पनि हिउँदमा नदी कुलोमा सिमित हुने गर्छ । सुन्दरीजलबाट उपत्यकामा खानेपानी ल्याइएपछि बाग्मतीमा थोरै पानी बग्ने गरेको छ । हिउँदमा पनि नदीमा पानी बगाउन शिवपुरी नागार्जुन राष्ट्रिय निकुञ्जमा बाँध निर्माण भइरहे पनि पूरा हुन सकेको छैन । नदी सफा बनाउन पानीको बहाव बढाइनुपर्ने आवाज उठे पनि पूरा हुन सकेको छैन ।

Leave a Reply

Your email address will not be published. Required fields are marked *